一個擁抱

尋晚絕對係我近呢一年最開心既一晚，因為我發左一個好夢．．

係夢既初期，係小菌對我既質問，其實大家都知我愛邊個，不過亦都知，以我既個性係唔會去爭取，結果令我同愛我既人都痛苦。做咩可以令我開心？呢個問題我都唔識答?只可以苦笑一下，然後沈默以對。其實我都有諗過，如果我得到佢，會開心嗎？但係個答應係：唔會。因為我唔想做第三者，更加做唔出佢地既第三者。如果我得唔到佢，會開心嗎？現實又好似幫我答左：唔會。進退兩難，我唯一可以做既，就係離開，慢慢咁放低一點一點咁忘記呢個人。

唔知過左幾耐，我依然係頹廢既我，任誰睇到都可以想像到我既生活，就好似呢幾個月既我一樣，甚至更頹廢．．

之後開始我係以鏡頭既視線睇到既，我見到小菌將我既心意話哂俾小車知，雖然我睇到，不過聽唔到佢既說話（點解我會知佢講既係我心意，睇埋下面就會知），而小車則靜靜咁聽，我諗當時已經係過左唔少日子，幾個月、或者幾年，因為佢地感覺上大個左，最後小菌講完佢要講既野就走左，淨低小車一個人坐呢度。
可能小車唔想我再咁落去，決定同我講清楚，約左我去一間環境比較靜同少人既cafe。我既衣著打扮，睇得出係比我前一幕見到既整齊，連表情亦都係我招牌既微笑，但係愁緒愁容依在，熟悉我既人一睇，就知呢一切係我勉強自己唔想人擔心而營造出黎。我坐低之後閒談左幾句，佢就同我講，小菌搵過佢，同佢講左ｄ關於我既野，不過佢希望我親口講，之後大家都沉默左好耐，我先儲夠勇氣講守係我心入面唯一既秘密，雖然呢個已經有小菌一個人知道左，唔算得上係秘密。可能係ｏ係夢入面，所以我居然能夠一次過講哂我對佢既心意俾佢知。佢聽完之後問左我一個問題：「點解你從來都冇同我講？」我雙眼早已經充滿淚水，當佢一問我既眼淚終於再忍唔住，激動地講「你已經有左佢，我仲可以點講？點爭取？」

大家又再沉默左一段時間，佢先開口問我：「咁你即係唔會爭取啦？」我冇出聲只係點左一下頭，佢就打算走，其實我好想拉住佢同佢講一聲：我愛你！但係理智控制住我既身體唔俾我咁做，一秒、兩秒、三秒，我終於追出去，不過我叫住佢，佢都唔停落黎，跟住我個頭撞到ｄ野令我跌低左，佢即刻返轉頭睇下我有冇咩事，我乘機捉住佢唔俾佢再走，而且仲講出左句：「我愛你，真係好愛好愛，可唔可以留係我身邊？」雖然我終於講出口，不過已經遲左好多，所以佢冇出聲我都明白．．正當我打算起身，佢突然從後攬住左我，呢種感覺好舒服、好實在，仲好平靜。

之後我醒左，依然感覺到有身貼身既餘溫係度．．都唔知我張床尋晚係咪有第２個人攬住我？哈！今日耐唔耐都感覺到俾人攬住既溫暖，真係好奇怪．．我從來都冇試過俾人從後攬住，而且擁抱都好耐冇咁。所以話人腦真係好神奇，竟然可以製造呢種感覺俾我，怪唔之得我細個曾經志願想造一部機，但係要造呢部機，要好熟識人既腦電波。人睇到既野、聽到既野、聞到既野、感覺到既野，都有唔同既腦電波，只要可以複製出呢ｄ腦電波，然後發放俾第２個人，咁佢都會接收到同一樣野，你要拍拖既感覺、幸福既感覺，佢都可以俾到你，不過始終都係一部機製造出黎既野，始終都係假既野，所以我放棄左‥